Hugleikur heldur jól - aftur
Jólaævintýri Hugleiks verður frumsýnt 10. desember 2023 í Gamla bíó í glænýrri uppsetningu. Handritið er byggt á A Christmas Carol eftir Charles Dickens en að þessu sinni er sögusviðið íslensk sveit seint á 19. öld. Leikfélagið setti verkið fyrst á svið fyrir 18 árum og ætlar nú að endurtaka leikinn vegna fjölda áskorana. Hátt í 40 einstaklingar taka þátt í uppfærslunni.
Einungis 2 sýningardagar: 10. og 17. desember.
Höfundar verksins eru Sigríður Lára Sigurjónsdóttir, Sigrún Óskarsdóttir, Snæbjörn Ragnarsson og Þorgeir Tryggvason. Gunnar Björn Guðmundsson leikstýrir.
Æfingar á Jólaævintýri Hugleiks eru nú í fullum gangi.
Hver veit nema áhorfendur, sem beðið hafa spenntir í 18 ár eftir að berja verkið augum á ný, muni sjá kunnugleg andlit á sviðinu frá fyrri uppsetningu?
Leikstjóri: Gunnar Björn Guðmundsson
Höfundar: Sigríður Lára Sigurjónsdóttir, Sigrún Óskarsdóttir, Snæbjörn Ragnarsson og Þorgeir Tryggvason
Höfundar tónlistar: Snæbjörn Ragnarsson og Þorgeir Tryggvason
Teiknað kynningarefni: Lóa Hjálmtýsdóttir
-
Höfundarnir
Höfundar verksins eru Sigríður Lára Sigurjónsdóttir, Sigrún Óskarsdóttir, Snæbjörn Ragnarsson og Þorgeir Tryggvason. Þeir tveir síðast nefndu eru einnig höfundar tónlistar og Ljótir hálfvitar.
Á myndinni er höfundahópurinn ásamt formanni Hugleiks, Sesselju Traustadóttur og gjaldkeranum Margréti Þorvaldsdóttur. Höfundur sögunnar, Charles Dickens, komst ekki á fundinn sökum dauða.
-
Fyrri uppfærsla
Jólaævintýri Hugleiks var sett upp í Tjarnarbíói árið 2005 og hefur síðan þá verið umtalað innan félagsins.
Verkið er byggt á Christmas Carol eftir Charles Dickens en í þessari útgáfu gerist verkið á Íslandi seint á 19. öld. Leikfélagið setti verkið fyrst á svið fyrir 18 árum og ætlar nú að endurtaka leikinn vegna fjölda áskorana. Þetta verk á sérstakan sess í hjörtum Hugleikara og margir hverjir geta ekki hugsað sér jólin án þess að spila tónlistina úr sýningunni.
-
Leikstjórinn
Leikstjóri sýningarinnar er hinn bráðfyndni Gunnar Björn Guðmundsson sem hefur leikstýrt meðal annars fjölda Áramótaskaupa, Ömmu Hófí og Astrópíu.
Gunnar Björn hefur einnig leikstýrt fjölda áhugaleiksýninga um land allt en vann í fyrsta sinn með Hugleik vorið 2023 þegar hann leikstýrði nýjasta verki félagsins, Húsfélaginu.
Frá uppsetningu á Jólaævintýri Hugleiks í Tjarnarbíói 2005
Kynslóðir Tomma litla
Þegar Hugleikur setti upp Jólaævintýrið árið 2005 fór Nanna Vilhelmsdóttir með hlutverk Tomma litla. Það sem kannski fáir vissu var að dóttir hennar, Úlfhildur Jónsdóttir, fór með afskaplega lítið hlutverk í þeirri uppfærslu og er til staðar á meðfylgjandi myndum úr fyrri uppsetningu - að vísu falin í móðurkviði. Þar sem hinn veiklulegi Tommi átti ekki að vera sérstaklega pattaralegur og Úlfhildur varð æ meira áberandi var hennar getið á heimasíðu Hugleiks sem "Sullur Tomma". Nú 18 árum síðar hefur hún tekið við hlutverki móður sinnar sem Tommi litli - sullslaus í þetta sinn.
Kapitóla Karlsdóttir
Myndband frá árinu 2005 sem tekið er við upptökur tónlistar úr upprunalegri uppsetningu Jólaævintýrisins.
Lag og texti: Snæbjörn Ragnarsson
Flutningur: Anna Bergljót Thorarensen
Myndbandsgerð: Guðmundur Erlingsson
