Leikhópurinn úr Feigð (2016) eftir Ármann Guðmundsson.
Myndin sýnir rautt á hvítu hve erfitt getur verið að taka þátt í að setja upp leiksýningu. Svo var líka niðursetningur.

Upphafið…

Í annálum félagsins er að finna sagnir um að í VW bjöllu hafi verið rætt um að stofna Leikfélag Íslands, hvorki meira né minna. Enda hafa flestar bestu hugmyndir seinni tíma fæðst á rúntinum.

Í febrúar 1984 var fyrsti fundur Hugleiks haldinn í útibúi Borgarbókasafnsins í Bústaðarkirkju. Þangað mættu um 20 manns, flest þeirra sjúkraþjálfarar og félagsráðgjafar. Fyrsta frumsýning félagsins var 14. apríl 1984 og hefur Hugleikur ekki linnt látum síðan.

Fjórir af stofnendum Hugleiks á sýningunni Húsfélagið vorið 2023.

Myndir úr Bónorðsförinni sem var frumsýnd 14.apríl 1984. Sá dagur hefur síðan verið haldinn hátíðlegur ár hvert sem afmælisdagur félagsins.

Þjóðsöngur Hugleiks

Þegar ég finn af þessu bragð
þá fer mér að hlýna,
eins og þú legðir ullarlagð
ofan á sálu mína.

Situr einn og segir frá,
sveitist við að ljúga.
Annar hlustar hrifinn á
og hamast við að trúa.

Sitja þar við sama borð
sex, og enginn lýgur.
Skemmtilegt og skrýtið orð
er Skólavörðustígur.

Lag: Björgvin Guðmundsson
Texti: Freysteinn Gunnarsson

Stiklað á afskaplega stóru…

  • Ó, þú aftur (2009)

    Klassísk ástarsaga sem byggir á persónum og stefjum úr „Pilti og stúlku“ eftir Jón Thoroddsen. Ungu elskendurnir Sigríður og Indriði verða ástfangin í sveitinni og einsetja sér að hittast í borginni að lokinni sláturtíð. Það gengur hins vegar ekki áreynslulaust fyrir sig, því þegar til borgarinnar er komið er svo ótal margt sem glepur, s.s. fjöldamótmæli, vængstífðir hrafnar, framandi skemmtistaðir, kynleg grös og alls kyns ólifnaður.

    Fyrst sett upp sem „Ó þú!“ 1987.

  • Bónorðsförin (1984)

    Allra fyrsta leikritið sem Leikfélagið Hugleikur setti upp var Bónorðsförin eftir Magnús Grímsson (1825-1860) í leikstjórn Steinunnar Gunnlaugsdóttur. Frumsýningin var í Félagsstofnun Stúdenta þann 14. apríl á því herrans ári 1984 og er þeirri dagsetningu haldið á lofti sem formlegum fæðingardegi leikfélagsins.

    Þar sem félagið leggur áherslu á að setja eingöngu upp verk eftir félagsmenn hefur Magnús oft verið kallaður fyrsti Hugleikarinn.

  • Embættismannahvörfin (1997)

    Leikritið gerist að Korpúlfsstöðum. Embættismenn borgarinnar, sem eiga þangað erindi, hverfa sporlaust með dularfullum hætti. Ungur embættismaður, Friðþjófur, er sendur til að leita þeirra. Hann verður margs vísari, því margt er öðruvísi á þessu fornfræga kúabúi en hann átti von á, og örlög embættismannanna önnur en nokkurn hefði órað fyrir.

  • Memento Mori (2004)

    Mememto Mori eftir Hrefnu Friðriksdóttur var fyrst sett upp í samstarfi við Leikfélag Kópavogs árið 2004 í leikstjórn Ágústu Skúladóttur. Leikhópurinn ferðaðist víða með verkið yfir nokkurra ára tímabil og sýndi leikritið meðal annars í Færeyjum (2006) og á leiklistarhátíð IATA í Suður-Kóreu (2007)

  • Skugga-Björg (1985)

    Leikgerð af Skugga-Sveini þar sem persónur höfðu allar skipt um kyn.

  • Sá glataði (2012)

    Sá glataði í leikstjórn Ágústu Skúladóttur var svokölluð samyrkjusýning (e.devised), skrifuð af Sigríði Láru Sigurjónsdóttur nánast meðan leikararnir spunnu senur upp úr biblíusögum, en þaðan var efniviður leikritsins sóttur. Svo miskunnasami samverjinn mætti auðvitað á svæðið ásamt ærinni Babýlon og sáningarmanninum Samúel.
    Leikferð á NEATA í Sønderborg, Danmörku.

  • Stútungasaga (1993)

    Leikritið Stútungasaga fjallar um líf Íslendinga á Sturlungaöld, á þeim tíma er Íslendingar ganga Noregskonungi á hönd. Atburðirnir eru sýndir í mjög kómísku ljósi og eru helstu persónur þess tíma dregnar sundur og saman í góðlegu háði.

  • Húsfélagið (2023)

    Húsfélagið er nýjasta leikrit úr smiðju Hugleiks. Í bland við reynslu- og hryllingssögur úr raunverulegum húsfélögum ákvað höfundahópurinn að krydda söguþráðinn með nokkrum punktum úr Njálu. Til að þetta yrði nú örugglega ekkert léttmeti.

    Gunnar Björn Guðmundsson leikstýrði verkinu og fannst við svo frábær (óstaðfest) að hann féllst á að taka Jólaævintýrið að sér í beinu framhaldi!

Nafnið

„Svo voru þau einhvern tímann heima hjá Sigrúnu Óskars að ákveða nafnið á leikfélaginu þegar Hugleikur Dagsson, þá sirka 2ja ára, hljóp yfir stofugólfið og Ingibjörg Hjartar segir: Ekki vera með læti Hugleikur minn!
Þá var ekki aftur snúið, fundarmenn litu hver á annan og sögðu einum rómi:

Auðvitað heitir félagið Hugleikur!“

Afrek og mont

Árið 2010 var söngleikurinn Rokk valin athyglisverðasta áhugaleiksýningin og sýnd tvisvar í Kassanum í Þjóðleikhúsinu. Höfundar voru Ásta Gísladóttir, Júlía Hannam, Sigurður H. Pálsson og Þórarinn Stefánsson. Höfundur tónlistar var Eggert Hilmarsson og samdi hann einnig söngtexta ásamt höfundahópinum.

Leikstjórar voru Þorgeir Tryggvason og Hulda Hákonardóttir.

Á þrítugasta afmælisári Hugleiks var söngleikurinn Stund milli stríða eftir Þórunni Guðmundsdóttur settur upp í Tjarnarbíói í leikstjórn Jóns St.Kristjánssonar. Sú sýning var valin athyglisverðasta áhugaleiksýningin leikárið 2013-14 og sýnd í Þjóðleikhúsinu vorið 2014.

Þórunn (eða doktor Tóta), sem hefur verið virkur félagi í Hugleik frá árinu 1997, skrifaði síðar framhald af Stund milli stríða. Framhaldsverkið hét Gestagangur og var sett upp vorið 2019. Sem kennari í MÍT hefur Þórunn einnig sett upp nokkrar óperur í samstarfi við Hugleik.

Smá bilun…

Hugleikur hefur byggt upp mikið gagnasafn um starfsemi félagsins. Sá fróðleiksbrunnur glímir sem stendur við tæknilega drauga – en særingamenn eru að störfum við að kveða þá niður.